More from Wacko Nation: Marlene Pullicino, her paRRRRRtneRRRR, the Count of Montekristo and tal-festi

Illum hi nfurmata li nhar il-Ġimgħa mijiet ta’ persuni fosthom ċittadini komuni, każini tal-baned, soċjetajiet, għaqdiet tal-armar u tan-nar, irċevew invit biex nhar il-Ġimgħa li ġej jattendu għal festin u djalogu dwar il-futur tal-festi. Magħhom kienu mistiedna wkoll il-President ta’ Malta, il-Prim Ministru Lawrence Gonzi u l-Kap tal-Oppożizzjoni Joseph Muscat.

“Għaldaqstant meta t-tkarwit ta’ tibdil impost qed jinħass, nemmen li għandna niltaqgħu, nitħaddtu u flimkien niġbru proposti għat-tisħiħ tal-festi,” jgħid l-invit ta’ Marlene Pullicino.

Din l-attività kienet organizzata f’temp ta’ ftit jiem u nħolqot biex tiddiskuti d-dokument tal-Knisja mniedi din il-ġimgħa dwar il-futur tal-festi. S’issa ħafna gergru bit-tibdil propost, fosthom dwar il-marċi u l-ħruq tal-murtali.

Mitlub jikkummenta dwar din l-attività, Godfrey Farrugia, is-sieħeb tad-Deputat u l-organizzatur tal-festin, ikkonferma li l-attività se tibda fit-8pm u tintemm tliet sigħat wara fil-MonteCristo f’Ħal Farruġ.

“Se tkun attività ta’ ikel u xorb b’xejn u li permezz t’hekk tlaqqa’ lil dawk in-nies kollha li għandhom għal qalbhom it-tradizzjonijiet Maltin u l-festi. Dan se jkun il-mument li nitkellmu ċar u tond x’irridu dwar il-festi.

“Irridu li n-nies isemmgħu leħinhom fil-privat u b’mod oġġettiv u ċivili u din se tkun l-okkażjoni ideali biex isir qsim ta’ dawn l-ideat,” spjega Farrugia.

“Il-finanzjament se jsir minn Marlene Pullicino u sibna l-għajnuna finanzjarja ta’ Charles Polidano. Dakinhar se jkollna sitt kelliema, wieħed minnhom kappillan, kif ukoll persuni li jaħdmu fl-armar, fin-nar u mal-baned, li se jagħmlu diskors iffukat u qasir ta’ tliet minuti kull wieħed dwar is-suġġett.”

Imma l-ħsieb wara l-attività jidher li se jmur pass ieħor ’l quddiem – l-imbuttar ta’ petizzjoni li s’issa d-dettalji tagħha u l-kontenut qed jinżammu mistura mill-organizzaturi.

Il-Kurja talbet biex sat-30 tax-xahar tirċievi r-rapport mill-għaqdiet lokali tal-baned bir-reazzjoni u s-suġġerimenti. Dan mistenni jkun il-bidu ta’ dan il-proċess ta’ ideat u reazzjonijiet.

“Qed nistiednu anke liċ-ċittadini komuni biex nhar il-Ġimgħa jiġu għall-attività u jiġu lebsin it-tshirt tal-festa jew l-emblema li turi l-identità tas-soċjetà li jirrappreżenta.”

Kemm id-Deputat Laburista Marlene Pullicino kif ukoll Godfrey Farrugia huma akkaniti tal-festi Maltin. It-tnejn li huma għandhom il-liċenzja biex ja˙dmu n-nar u t-tnejn huma Presidenti Onorarji ta’ bosta soċjetajiet differenti.

Farrugia hu President Onorarju tal-Banda San Filep ta’ Ħaż Żebbuġ u tas-Soċjetà Santa Marija tal-Qrendi. Marlene Pullicino hi President Onorarju tal-Karmnu taż-Żurrieq, ta’ San Ġużepp ta’ Ħal Safi, San Filep f’Ħaż Żebbug u President Onorarju tas-Soċjetà Filarmonika ta’ Lourdes fil-Qrendi.

Il-persuni li qed jorganizzaw din l-attività ibbukkjaw numru ta’ reklami f’gazzetti lokali iżda sabu bieb magħluq mill-mezzi tax-xandir tal-Partit Nazzjonalista.

“In-Nazzjon u Il-Mument irrifjutaw ir-reklam bi ħlas li ridna nagħmlu. L-iskuża li ġabu kienet li din, skont huma, hi attività politika. Dan mhux il-każ,” qal Farrugia.

Mistoqsi jekk id-Deputat Laburista ġabitx il-permess mill-Partit Laburista biex tagħmel din l-attività, it-tweġiba kienet fin-negattiv.